Նորություններ և հայտարարություններ   

ԳԹԿ-Ն ՄԱՍՆԱԿՑԵԼ Է ԿՐԹՈՒԹՅԱՆ ՈՐԱԿԻ ԳՆԱՀԱՏՄԱՆ ԵՎՐԱՍԻԱԿԱՆ ԱՍՈՑԻԱՑԻԱՅԻ ՀԻՄՆԱԴԻՐ ՀԱՄԱԳՈՒՄԱՐԻՆ

2012թ – ի նոյեմբերի 9-10 ժամանակահատվածում տեղի ունեցավ կրթության որակի գնահատման Եվրասիական ասոցիացիայի (ЕАОКО) առաջին հիմնադիր համագումարը:

ЕАОКО-ն հիմնադրվել է 2012թ-ի հունիսի 25-ին ռուսական առաջատար մասնագետների կողմից` Ռուսաստանի և ԱՊՀ երկրների կրթության որակի գնահատման ոլորտի մասնագիտական պոտենցիալի ընդլայնման և խթանման, ինչպես նաև Եվրասիական տարածաշրջանում գոյություն ունեցող փորձի տարածման նպատակով: 

Համագումարին մասնակցության հրավեր էր ստացել նաև ԳԹԿ պատվիրակությունը` ի դեմս ԳԹԿ տնօրենի պաշտոնակատար Ա. Բաղդասարյանի և բաժնի պետ Ա. Եսայանի:

Ա. Բաղդասարյանն իր ելույթում ներկայացրեց կրթության որակի գնահատման ոլորտում ՀՀ-ում իրականացված քայլերը, ինչպես նաև այն ուղղությունները, որով Հայաստանը պատրաստ է համագործակցել և կիսել իր փորձը:

Նշենք, որ Հայաստանը հանդիսանում է IEA (The International Association for the Evaluation of Educational Achievement) միջազգային կազմակերպության անդամ, որի շրջանակներում մասնակից է դարձել TIMSS միջազգային ստուգատեսին: Իսկ այժմ, պատեհ առիթ է ներկայանում Եվրասիական տարածաշրջանում գործող նմանատիպ կառույցի գործունեության մեջ  ներգրավվելու և այս ոլորտում սեփական նորամուծությունների արդեն իսկ գոյություն ունեցող փորձով կիսվելու համար: 

Ինչպես այդ առիթով նշեց ЕАОКО նախագահ ակադեմիկոս Վ. Ա. Բոլոտովը` միջազգային հետաքրքրություն կա հայկական նախագծերի հանդեպ, մասնավորապես հայագիտական առարկաներից ազգային հետազոտությունների նկատմամբ: