Նորություններ և հայտարարություններ   

ՄԻՆՉԵՎ 2014Թ. ՀՈՒԼԻՍԻ 31-Ը ԶՈՐԱՑՐՎՈՂ ԶԻՆԾԱՌԱՅՈՂՆԵՐԻ` ԲՈՒՀԵՐԻ ԸՆԴՈՒՆԵԼՈՒԹՅԱՆ ՄՐՑՈՒՅԹԻՆ ՄԱՍՆԱԿՑԵԼՈՒ ՄԱՍԻՆ

Սույն թվականի մայիսի 29-ին Հայաստանի Հանրապետության կառավարության կողմից ընդունվել է թիվ 564-Ն որոշումը /ուժի մեջ է մտել 2014թ. հունիսի 12-ին/՝ Հայաստանի Հանրապետության կառավարության 2012թ. ապրիլի 26-ի թիվ 597-Ն որոշման մեջ լրացումներ և փոփոխություններ կատարելու մասին: Այդ որոշման համաձայն մինչև հուլիսի 31-ը զորացրվող զինծառայողներն իրավունք են ստանում մասնակցել բուհերի տվյալ տարվա ընդունելության մրցույթին՝ մինչև զորակոչվելն ստացած միասնական քննությունների վկայագրով՝ օգտվելով բանակից զորացրվածների համար սահմանված արտոնություններից:

Հիշեցնենք, որ ՀՀ կառավարության 2012թ. ապրիլի 26-ի թիվ 597-Ն որոշման 107 կետի համաձայն պարտադիր ժամկետային զինվորական ծառայությունից զորացրված դիմորդները զորացրվելուց հետո 3 տարվա ընթացքում, քննությունները դրական միավորներով հանձնելու դեպքում, անվճար ուսուցմամբ ընդունվում են ընդհանուր մրցույթից դուրս՝ առանձին մրցույթով՝ ՀՀ կառավարության կողմից հաստատված և բանակից զորացրվածների համար ըստ մասնագիտությունների տրամադրված տեղերում: Անվճար ուսուցման մրցույթից դուրս մնալու դեպքում դիմորդները վճարովի ուսուցման մրցույթին մասնակցում են ընդհանուր հիմունքներով: Եթե բանակից զորացրված դիմորդները հայտագրել են միայն վճարովի ուսուցման տեղերի մասնագիտություններ, բուհ են ընդունվում մրցույթից դուրս:

            Բանակից զորացրվածների համար, համաձայն ՀՀ կառավարության 2012թ. ապրիլի 26-ի թիվ 597-Ն որոշման 24 կետի, բուհերի ընդունելության  մրցույթին մասնակցելու համար բուհերում դիմում-հայտ լրացնելու և փաստաթղթերը ներկայացնելու ժամկետ է սահմանված հունիսի 25-ից հուլիսի 2-ը:

ՀՀ կառավարության <<Հայաստանի Հանրապետության կառավարության 2012թվականի ապրիլի 26-ի թիվ 597-Ն որոշման մեջ լրացումներ և փոփոխություններ կատարելու մասին>> 2014թ. մայիսի 29-ի թիվ 564-Ն որոշման համաձայն՝

1.       ովքեր են կարող դիմել բուհերի ընդունելության մրցույթին մասնակցելու համար.

բուհերի ընդունելության մրցույթին մասնակցելու համար կարող են  դիմել տվյալ տարվա գարնանային-ամառային զորացրումից մինչև հուլիսի 31-ը զորացրվող զինծառայողները, եթե նրանք ունեն մինչև զորակոչվելը ստացած միասնական քննությունների վկայագիր:

 2.      Զորացրվող զինծառայողները երբ կարող են դիմել բուհերի ընդունելության մրցույթին մասնակցելու համար.

զորացրվող զինծառայողները լիազորված անձի միջոցով հունիսի 25-ից հուլիսի 2-ին կարող են դիմել այն բուհ, որն առաջինը պետք է հայտագրեն իրենց դիմում-հայտում:

 3.      Ինչ փաստաթղթեր պետք է ներկայացնեն զորացրվող զինծառայողները՝ բուհերի ընդունելության մրցույթին մասնակցելու համար.

զորացրվող զինծառայողները պետք է ներկայացնեն

·         զորամասի հրամանատարի կողմից տրված տեղեկանք այն մասին, որ զինծառայողի զորացրումը տեղի է ունենալու մինչև հուլիսի 31-ը /կից ներկայացվում է զորամասի հրամանատարի կողմից տրվող տեղեկանքի նմուշը/,

·         զորացրվող զինծառայողի կողմից տրված լիազորագիր, որը լիազորագրում նշված անձը ներկայացնում է բուհի ընդունող հանձնաժողովին /կից ներկայացվում է լիազորագրի նմուշը/ և բուհի ընդունելության դիմում-հայտում հայտագրում է բուհերի ընդունելության մրցույթին մասնակցության մասնագիտությունները՝ լիազորագրում նշված հերթականությամբ,

·         անձը հաստատող փաստաթղթի պատճենը,

·         6 հատ 3x4 չափսի լուսանկար:

  Տեղեկանք և լիազորագիր