Նորություններ և հայտարարություններ   

Գնահատման և թեստավորման կենտրոնը հունիսի 24-ից սկսում է 2018-2019 ուստարվա և նախորդ տարիների շրջանավարտների լրացուցիչ քննությունների կազմակերպման գործընթացը

Գնահատման և թեստավորման կենտրոնը հունիսի 24-ից սկսում է 2018-2019 ուստարվա և նախորդ տարիների շրջանավարտների «Հայոց լեզու և հայ գրականություն», «Հայոց պատմություն», «Ընդհանուր պատմություն», «Մաթեմատիկա», «Անգլերեն», «Ֆրանսերեն», «Գերմաներեն», «Իտալերեն», «Իսպաներեն», «Պարսկերեն», «Ռուսաց լեզու», «Ֆիզիկա», «Քիմիա», «Կենսաբանություն» և «Աշխարհագրություն» առարկաների պետական ավարտական, միասնական և կենտրոնացված (պետական ավարտական և բուհերի ընդունելության) լրացուցիչ քննությունների  կազմակերպման գործընթացը:

Պետական ավարտական լրացուցիչ քննություններին կարող են մասնակցել`

• հիմնական փուլի  քննություններին չմասնակցած շրջանավարտները,
• միասնական քննության ավարտական մասը (Ա մակարդակ) չհաղթահարած շրջանավարտները,
• պետական ավարտական քննություններից (2 առարկայից ոչ ավելի) անբավարար ստացած շրջանավարտները:

Այն շրջանավարտները, որոնք չեն հայտագրվել պետական ավարտական քննություններին, իրենց դպրոցներում պետք է ներկայացնեն դիմում տնօրենի անունով: 

Պետական ավարտական քննություններից անբավարար ստացած կամ պետական ավարտական քննական առարկաներից միասնական քննության ավարտական մասը (Ա մակարդակ) չհաղթահարած շրջանավարտները պետական ավարտական քննություններին (վերաքննություններին) մասնակցելու համար նոր դիմում չեն լրացնում: 

Վերաքննություն հանձնողների տվյալները Գնահատման և թեստավորման կենտրոն են ներկայացնում մարզերի (Երևանի քաղաքապետարանի) կրթության վարչությունները:

Միասնական և կենտրոնացված լրացուցիչ քննություններին (2019թ. բուհերի ընդունելության) կարող են մասնակցել`

• այն շրջանավարտները, որոնք առաջին փուլի քննություններին մասնակցելու համար չեն հայտագրվել,
• նախնական և միջին մասնագիտական ուսումնական հաստատության 2019թ. շրջանավարտները, 
• օտարերկրյա ուսումնական հաստատությունների  2019թ. շրջանավարտները,
• այն շրջանավարտները, որոնք միասնական քննությանը հարգելի պատճառով չեն մասնակցել կամ հիվանդության պատճառով ընդհատել են քննությունը,
• բողոքարկման հանձնաժողովի կողմից միասնական քննությունների լրացուցիչ փուլին մասնակցելու թույլտվություն ստացած շրջանավարտները:

Միասնական և կենտրոնացված լրացուցիչ քննություններին մասնակցելու համար անհրաժեշտ է`

• լրացնել դիմում-հայտ,
• ՀՀ ֆինանսների նախարարությունում Գնահատման և թեստավորման կենտրոնի 900018003401 հաշվի համարին յուրաքանչյուր քննությանը մասնակցելու  համար փոխանցել 1500 (հազար հինգ հարյուր) դրամ:
• անձը հաստատող փաստաթղթի պատճեն,
• 3X4 չափի լուսանկար:

Միասնական և կենտրոնացված քննությունների վճարից (1500 դրամ) ազատվում են

• պարտադիր ժամկետային զինվորական ծառայությունից զորացրվածները,
• առաջին ու երկրորդ խմբերի և մինչև 18 տարեկան մանկուց հաշմանդամները,
• ՀՀ պաշտպանության ժամանակ զոհված զինծառայողների երեխաները,
• առանց ծնողական խնամքի մնացած մինչև 23 տարեկան անձինք:

Վերոգրյալ խմբերին պատկանող անձինք դիմում-հայտին համապատասխանաբար կցում են զինվորական գրքույկի պատճենը, հաշմանդամության գրքույկի պատճենը, ՀՀ պաշտպանության նախարարության, ՀՀ կառավարությանն առընթեր ոստիկանության և ՀՀ կառավարությանն առընթեր ազգային անվտանգության ծառայությունների կողմից տրված տեղեկանքների պատճենները, ինչպես նաև առանց ծնողական խնամքի մնացած լինելու վերաբերյալ համապատասխան փաստաթղթերի պատճենները:

Դիմում-հայտերը լրացվում և ընդունվում են Գնահատման և թեստավորման կենտրոնում հունիսի 24-ից` ամեն օր` ժամը 10:00- 17:00:

Հասցեն` Երևան, Այգեստան 9/4:

Ընդունման ժամկետն ավարտվում է հունիսի 30-ին` ժամը 17:00-ին:

Լրացուցիչ տեղեկությունների համար զանգահարել 57 54 60 հեռախոսահամարով:

Գնահատման և թեստավորման կենտրոն